هؤلاء ما يطلقون عليهم زملكاوية

مركز ( بوابة المرمى ) فعلا الناس اللي في المركز أكتر ناس بتستحمل قرف الفرقة كلها زي البواب اللي شايل هموم العمارة كلها يمسح السلم ويمسح العربيات ويجيب الطلبات للعمارة كلها وفي نفس الوقت مايسبهاش عشان يحرسها من السرقة !! ملحوظة ( الإستنساخ لم ينجح في مصر )1

1- عبد الواحد السيد : أحسن من قام بحراسة البوابة بس عنده عقدة إسمها الخروج من المرمى لو أي كورة عرضية يلزق في الجون زي مايكون مربوط في العارضة بحبل خفي (بس الوحيد اللي يصلح للإستمرار في الزمالك ولو رحل تبقي خسارة كبيرة جدا)

2- محمد عبد المنصف : تاني أحسن من قام بحراسة البوابة وهو عامة بيبقي في الطيلمانة بيلبس شوية إجوان عجب ويصد كور مايصدهاش غير بوفون (غالباْ ملبوس)

3- عماد السيد : ماعرفش حد بالإسم دا!!!

ولكن .... تحول إلي كبد ملئ بالسموم غير قادر علي آداء وظائفه يفشل في التخلص من السموم (الأخطاء) في كل مرة يتعرض فيها الجسم (الزمالك) للمرض (الخطر)

مركز ( كبد الدفاع ) قلب الدفاع سابقاْْ زمان كان إسمه قلب الدفاع وأعتقد عشان حاجتين إنه أولاْ يكون راجل وعنده قلب جامد وثانياْ يكون عنده إحساس بمكانه في الملعب.

4 - هاني سعيد: الواحد مش عارف إنت مع مين بالظبط بس أكيد قصير بالنسبة لليبرو (بردو مهم للفرقة)

5- محمود فتح الله: مدافع كويس لكن قلبه قلب فار دايما يرجع قصاد المهاجم مش عارف خايف يعرقله ولا خايف يرقصه بس في الحالتين خايف (بردو مهم للفرقة)

6- أحمد مجدي: اللي عملك مدافع ظلمك واللي أساسا لعبك كورة ظلمك أكتر (لاتعليق)

7- عمرو الصفتي: قلب أسد ودماغ عصفورة وجسم ... (غالبا تجربة هندسة وراثية)

10- عمرو عادل : ماعرفش حد بالإسم دا

مركز ( الظهير الخفي ) ... كان إسمه زمان الأيمن لكن مفيش أوفرات بتترفع بالرجل اليمين من المكان دا خالص عشان كدة أصبح إسمه الخفي وبردو لإن لو عايز تهجم علي الزمالك هجمة عنترية فأنا برشحلك المكان دا بكل جوارحي الرقابه هاتلاقيها خفيفة ظريفة لا تتعدى شد من الفانلة (طبعا مش لدرجة إنذار) أو تلامس خفيف (يريح عليك) ومش هاتلاقي أي إشتراك في الأوفر لإن الظهير الخفي بيقف علي بعد 5 متر مكعب من الكورة (حقيقة علمية)

11- أحمد غانم سلطان: عنده إستعداد يجري 120 دقيقة بس ماتطلبش منه حاجات قمة في الصعوبة 1- يرفع كورة بالمقاس 2- يرفع عينه وهو بيجري 3 - يعمل فاول تكتيكي (يعني فاول يوقف بيه اللعب مش يطرد فيه يارب يكون بيقرأ عشان يتعلم)

13- حازم إمام :حتي الان لاعب كويس سريع واثق في نفسه(ربنا يستر عليه من الايام)

مركز (الظهير المتصابي) .. زي العجوز المتصابي بالظبط بيتظاهروا بكل أفعال فترة المراهقة رغم إنها ولت وعدت من زمان ينزل الماتش يرفع ويشوط ويغطي ويدافع ويهاجم وفجأة وبدون سابق إنذار المفعول ينتهي ويبتدي يحس بتقل في رجليه كأنه خلاص هايموت بس يبقي فرحان بالشويتين اللي عملهم

14- أسامة حسن: تقيل تقيل تقيل يامجنني (مع الإعتذار للسندريلا)

15 - علاء علي: لو تفتح صفحة الظهير الأيسر في تاريخ الزمالك هاتلاقي إن الصفات الجسمانية والعقلية للمركز دا لم تتغير منذ عهد مينا موحد القطرين - (قصير - جسمه ضعيف - لايجيد اللعب في مركز الظهير الأيسر) إذن العيب مش فيه لإنه لم يشذ عن القاعدة

مركز (الوسط المشنافع) المدافع سابقاْ أو (لاعبي الإنتكاس) الإرتكاز سابقا .. أيوة مشنافع وإنتكاس، السبعة اللي تحت دول أكتر من نصهم عايز إعدام و الباقي عايز إعادة تأهيل ويمكن واحد أو إتنين وبقول ممكن يجي منهم مع الوقت اللي هو مش موجود أصلاْ ْ

17- أيمن عبد العزيز: فرعون تركيا القادم برياح التغيير والثورة التركية في الكورة المصرية، وتعال ياعم إتفرج في الملعب ... إيه دا!! إيه اللي أنا شايفه دا!! مين دا؟ إقفل التلفزيون بدل ماخش أضربه!! (تايه، باصات مقطوعة كما لو إنه بيلعب بعين واحدة، هي الكورة في تركيا بقت كدة؟؟)

19- أحمد عبد الرؤوف: ممكن يجي منه مع الوقت (إعادة تأهيل)

21- علاء عبد الغني: اللعيب دا مات إكلينكيا في تصادم طائرة مع إتوبيس نقل عام في السعودية (جريدة صوت العقل الفيومية)

22- أحمد الميرغني: لو فضل جسمه بالشكل دا يبقي بلاش منه أحسن من دلوقتي ويبتدي يشوف نادي تاني (إعادة تأهيل)

23-حسن مصطفي لاعب جامد بس راح مستقبله في اخر سنتين مع الاهلي (شربها الزمالك)

مركز (اللي هايعدلوا المايلة) .. صانع الألعاب سابقاْ .. زمان كان المكان دا للعيب رايق بيبدع ويفنن ويباصي كورة مقشرة للهجامة والإرتكاز يأمنه لكن دلوقتي مطلوب منه يدافع ويلتحم ويباصي ويرقص ويشوط ويجيب إجوان يعني من الآخر يبقي فرقة كاملة (ملحوظة: سوبرمان وباتمان وفرافيرو إعتذروا عن الإنضمام عشان الجو في مش مناسب للطيران طوال أيام السنة)

24- شيكابالا : الولد بيموت بالراحة الناس بتحمله أكبر من طاقته ولإنه مش زي بقية الأبطال مابيقولش لأ وبيقعد يحارب في الملعب لوحده بس لاحظت في ماتش الأهلي اللي فات إنه بيلعب من غير نفس يتهئ لي إنه إبتدي يزهق

مركز (فاقدي الذاكرة) الهجوم سابقاْ .. يتميز لاعبو هذا المركز بالفقدان الجزئي وفي بعض الأحيان الكلي للذاكرة فلايتذكروا أين هم أو ماذا يفعلون في الملعب أو مين الناس اللي لابسة أبيض دي أو أصلاْ إيه البتاعة الأبيض في إسود دي اللي هم قاعدين بيجروا وراها 90 دقيقة دا لو جريوا أساساْ!!!!

26- أجوجو : (المصارعة هي الحل) مفيش حد ينكر إن جسم أجوجو من أكبر مميزاته في الإلتحامات والكرات العالية لكن ...... وآه من الكلمة دي - اللمسة الأخيرة

لما شفت أجوجو في الملعب عرفت المعنى الحقيقي للكلمة دي وعرفت ليه ماراحش نادي كبير في أوروبا رغم لياقته البدنية العالية بس الندم مايفيدش (مهاجم بدون فعالية زي القطة المشمشية حلوة بس شقية)

27- جمال حمزة : واحد صاحبي قالها لي (جمال لما يسترجل عامل زي رونالدينهو لما يتدلع) لعيب ماعندوش غيرة علي الفانلة ولا حتى بيبذل مجهود أراهن إنه بنسبة 99 % ماعرقش في ماتش الأهلي وبس طالع يشاور علي البادج ويبوس الفانلة وحركات مابنشوفهاش غير في مصر وفي الزمالك علي وجه الخصوص (لو مشي مش هازعل ولو قعد مش هازعل عشان في الحالتين هو مش موجود)

30- شريف أشرف: المستقبل بيد الله والحاضر لا يشفع فلتستمر لعل وعسى